ਪਟਿਆਲਾ
ਵਧੀਕ ਡਿਪਟੀ ਕਮਿਸ਼ਨਰ (ਜ) ਗੁਰਪ੍ਰਰੀਤ ਸਿੰਘ ਥਿੰਦ ਨੇ ਡਿਪਟੀ ਕਮਿਸ਼ਨਰ ਸਾਕਸ਼ੀ ਸਾਹਨੀ ਦੀ ਪ੍ਰਵਾਨਗੀ ਨਾਲ ਇੱਕ ਹੁਕਮ ਜਾਰੀ ਕਰਦਿਆਂ ਜ਼ਿਲ੍ਹੇ ਅੰਦਰ ਖਾਦ ਵਿਕਰੇਤਾਵਾਂ ਵਲੋਂ ਸਬਸਿਡੀ ਉਪਰ ਦਿੱਤੀ ਜਾਣ ਵਾਲੀ ਯੂਰੀਆ ਖਾਦ ਅਤੇ ਡੀਏਪੀ ਖਾਦ ਵੇਚਣ ਸਮੇਂ ਹੋਰ ਖੇਤੀ ਸਮੱਗਰੀ (ਜਿਵੇਂ ਕਿ ਕੀੜੇਮਾਰ ਦਵਾਈਆਂ ਤੇ ਬਾਇਓ ਖਾਦਾਂ ਆਦਿ) ਦੀ ਕਿਸਾਨਾਂ ਨੂੰ ਜਬਰਨ ਟੈਗਿੰਗ ਕਰਨ ਦੀ ਮਨਾਹੀ ਦੇ ਹੁਕਮ ਜਾਰੀ ਕੀਤੇ ਹਨ।
ਏਡੀਸੀ ਥਿੰਦ ਨੇ ਕਿਹਾ ਕਿ ਕਿਸਾਨਾਂ ਅਤੇ ਕਿਸਾਨ ਜਥੇਬੰਦੀਆਂ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਧਿਆਨ ‘ਚ ਲਿਆਂਦਾ ਹੈ ਕਿ ਕੁਝ ਖਾਦ ਡੀਲਰਾਂ ਵਲੋਂ ਕਿਸਾਨਾਂ ਦੀ ਲੋੜ ਤੋਂ ਬਗੈਰ ਕੀੜੇਮਾਰ ਦਵਾਈਆਂ ਤੇ ਬਾਇਓ ਖਾਦਾਂ ਆਦਿ ਨੂੰ ਯੂਰੀਆ ਤੇ ਡੀਏਪੀ ਖਾਦ ਦੇ ਨਾਲ ਜਬਰੀ ਥੋਪਿਆ ਜਾਂਦਾ ਹੈ।
ਏਡੀਸੀ ਗੁਰਪ੍ਰਰੀਤ ਸਿੰਘ ਥਿੰਦ ਨੇ ਇਸ ਲਈ ਸਮੂਹ ਖਾਦ ਵਿਕਰੇਤਾ ਡੀਲਰਾਂ ਅਤੇ ਸਹਿਕਾਰੀ ਸਭਾਵਾਂ ਨੂੰ ਇਹ ਹਦਾਇਤ ਕੀਤੀ ਕਿ ਜੇਕਰ ਉਨਾਂ੍ਹ ਵੱਲੋਂ ਕਿਸੇ ਵੀ ਕਿਸਾਨ ਨੂੰ ਖਾਦ ਦੇ ਨਾਲ ਕਿਸੇ ਹੋਰ ਖੇਤੀ ਸਮੱਗਰੀ ਬਿਨਾਂ੍ਹ ਲੋੜ ਜਾਂ ਕਿਸਾਨ ਦੀ ਮੰਗ ਤੋਂ ਬਗੈਰ ਵੇਚੀ ਜਾਂ ਦਿੱਤੀ ਜਾਂਦੀ ਹੈ ਤਾਂ ਅਜਿਹਾ ਕਰਨ ਦੀ ਸੂਰਤ ‘ਚ ਸਬੰਧਤ ਡੀਲਰ, ਸਹਿਕਾਰੀ ਸਭਾਵਾਂ, ਦੁਕਾਨਦਾਰਾਂ ਵਿਰੁੱਧ ਖਾਦ ਕੰਟਰੋਲ ਆਰਡਰ, 1985 ਅਧੀਨ ਸਖਤ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇਗੀ।
ਏਡੀਸੀ ਨੇ ਹਾੜੀ ਸੀਜਨ 2022-23 ਦੀ ਬਿਜਾਈ ਨੂੰ ਮੁੱਖ ਰੱਖਦੇ ਹੋਏ ਇਹ ਵੀ ਹਦਾਇਤ ਕੀਤੀ ਕਿ ਪ੍ਰਤੀ ਕਿਸਾਨ ਨੂੰ ਪ੍ਰਤੀ ਦਿਨ ਡੀਏਪੀ ਦੇ 25 ਥੈਲੇ ਤੋਂ ਵੱਧ ਨਾ ਵੇਚੇ ਜਾਣ ਤਾਂ ਜੋ ਕਿਸਾਨਾਂ ਵਿਚ ਡੀਏਪੀ ਦੀ ਬਰਾਬਰ ਵੰਡ ਕੀਤੀ ਜਾ ਸਕੇ। ਉਨਾਂ੍ਹ ਨੇ ਮੁੱਖ ਖੇਤੀਬਾੜੀ ਅਫ਼ਸਰ, ਪਟਿਆਲਾ ਨੂੰ ਇਨ੍ਹਾਂ ਹੁਕਮਾਂ ਦੀ ਪਾਲਣਾ ਕਰਵਾਉਣ ਲਈ ਸਮੂਹ ਖਾਦ ਵਿਕਰੇਤਾ ਅਤੇ ਸਹਿਕਾਰੀ ਸਭਾਵਾਂ ਨੂੰ ਆਪਣੇ ਪੱਧਰ ‘ਤੇ ਵੀ ਸੂਚਿਤ ਕਰਨ ਲਈ ਪਾਬੰਦ ਕੀਤਾ ਗਿਆ ਹੈ।
