ਬੀਐਲਓ ਦੀ ਸਕੂਲ ‘ਚੋਂ ਮਿਲੀ ਲਾਸ਼!
ਬੀਐਲਓ ਦੀ ਸਕੂਲ ‘ਚੋਂ ਮਿਲੀ ਲਾਸ਼!
ਮੁਰਸ਼ਿਦਾਬਾਦ (ਪੱਛਮੀ ਬੰਗਾਲ), 12 ਜਨਵਰੀ, 2026:
ਪੱਛਮੀ ਬੰਗਾਲ ਦੇ ਮੁਰਸ਼ਿਦਾਬਾਦ ਜ਼ਿਲ੍ਹੇ ਵਿੱਚ ਇੱਕ ਦੁਖਦਾਈ ਘਟਨਾ ਵਾਪਰੀ ਹੈ, ਜਿੱਥੇ ਇੱਕ ਬੂਥ ਲੈਵਲ ਅਫਸਰ (BLO) ਦੀ ਲਾਸ਼ ਸ਼ਨੀਵਾਰ ਰਾਤ ਨੂੰ ਉਸਦੇ ਸਕੂਲ ਦੇ ਕਮਰੇ ਵਿੱਚ ਲਟਕਦੀ ਮਿਲੀ। ਪਰਿਵਾਰਕ ਮੈਂਬਰਾਂ ਨੇ ਇਸ ਪਿੱਛੇ ਭਾਰੀ ਕੰਮ ਦੇ ਬੋਝ ਅਤੇ ਦੋਹਰੀਆਂ ਜ਼ਿੰਮੇਵਾਰੀਆਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਮ੍ਰਿਤਕ ਦੀ ਪਛਾਣ ਹਮੀਮੁਲ ਇਸਲਾਮ (47) ਵਜੋਂ ਹੋਈ ਹੈ।
ਹਮੀਮੁਲ ਇਸਲਾਮ ਕ੍ਰਿਸ਼ਨਾਪੁਰ ਲੜਕਿਆਂ ਦੇ ਪ੍ਰਾਇਮਰੀ ਸਕੂਲ ਵਿੱਚ ਅਧਿਆਪਕ ਅਤੇ ਖਰੀਬੋਨਾ ਗ੍ਰਾਮ ਪੰਚਾਇਤ ਦੇ ਇੱਕ ਪੋਲਿੰਗ ਸਟੇਸ਼ਨ ‘ਤੇ ਬੀ.ਐਲ.ਓ. ਵਜੋਂ ਤਾਇਨਾਤ ਸੀ। ਹਮੀਮੁਲ ਸ਼ਨੀਵਾਰ ਸਵੇਰੇ ਸਕੂਲ ਗਿਆ ਸੀ ਪਰ ਦੁਪਹਿਰ ਤੱਕ ਘਰ ਵਾਪਸ ਨਹੀਂ ਆਇਆ। ਕਾਫੀ ਭਾਲ ਤੋਂ ਬਾਅਦ, ਉਸਦੀ ਲਾਸ਼ ਸ਼ਨੀਵਾਰ ਰਾਤ ਨੂੰ ਸਕੂਲ ਦੇ ਵਿਹੜੇ ਵਿੱਚ ਇੱਕ ਕਮਰੇ ਵਿੱਚ ਲਟਕਦੀ ਮਿਲੀ।
ਦੂਜੇ ਪਾਸੇ ਰਾਣੀਤਲਾ ਪੁਲਿਸ ਸਟੇਸ਼ਨ ਨੇ ਲਾਸ਼ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ ਅਤੇ ਪੋਸਟਮਾਰਟਮ ਲਈ ਭੇਜ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪਰਿਵਾਰ ਦਾ ਮੁੱਖ ਦੋਸ਼ ਹੈ ਕਿ ਹਮੀਮੁਲ ਇਸਲਾਮ ਅਧਿਆਪਕ ਅਤੇ ਬੀ.ਐਲ.ਓ. ਦੀਆਂ ਦੋਹਰੀਆਂ ਜ਼ਿੰਮੇਵਾਰੀਆਂ ਕਾਰਨ ਬਹੁਤ ਜ਼ਿਆਦਾ ਤਣਾਅ ਵਿੱਚ ਸੀ।
ਮ੍ਰਿਤਕ ਦੇ ਵੱਡੇ ਭਰਾ, ਫਰਮਾਨ ਉਲ ਕਲਾਮ ਨੇ ਦੋਸ਼ ਲਾਇਆ ਕਿ SIR ਨਾਲ ਸਬੰਧਤ ਕੰਮਾਂ ਨੂੰ ਪੂਰਾ ਕਰਨ ਦਾ ਦਬਾਅ ਹਾਲ ਹੀ ਦੇ ਹਫ਼ਤਿਆਂ ਵਿੱਚ ਕਾਫ਼ੀ ਵੱਧ ਗਿਆ ਸੀ, ਜੋ ਉਸਦੇ ਭਰਾ ਦੀ ਸਮਰੱਥਾ ਤੋਂ ਬਾਹਰ ਸੀ।
ਉਧਰ, ਭਾਗਬੰਗੋਲਾ ਤੋਂ ਤ੍ਰਿਣਮੂਲ ਕਾਂਗਰਸ ਦੇ ਵਿਧਾਇਕ ਰਿਆਜ਼ ਹੁਸੈਨ ਸਰਕਾਰ ਨੇ ਪਰਿਵਾਰ ਨਾਲ ਮੁਲਾਕਾਤ ਕੀਤੀ ਅਤੇ ਚੋਣ ਕਮਿਸ਼ਨ ‘ਤੇ ਦੋਸ਼ ਲਾਇਆ ਕਿ ਉਹ SIR ਪ੍ਰਕਿਰਿਆ ਵਿੱਚ ਜਲਦਬਾਜ਼ੀ ਕਰ ਰਿਹਾ ਹੈ। ਵਿਧਾਇਕ ਨੇ ਕਿਹਾ ਕਿ ਇਸ ਜਲਦਬਾਜ਼ੀ ਕਾਰਨ ਬੀ.ਐਲ.ਓਜ਼ ‘ਤੇ ਬਹੁਤ ਜ਼ਿਆਦਾ ਕੰਮ ਦਾ ਬੋਝ ਪੈ ਰਿਹਾ ਹੈ, ਜਿਸ ਵਿੱਚ ਹਮੀਮੁਲ ਇਸਲਾਮ ਨੂੰ ਮੈਪਿੰਗ ਅਤੇ ਡੀ-ਮੈਪਿੰਗ ਸਮੇਤ ਬਹੁਤ ਸਾਰਾ ਕੰਮ ਦਿੱਤਾ ਗਿਆ ਸੀ।
