ਆਂਗਣਵਾੜੀ ਵਰਕਰ ਦੀ ਨੌਕਰੀ ਬਹਾਲ ਕਰਨ ਬਦਲੇ ਅਧਿਕਾਰੀ ‘ਤੇ ਲੱਗੇ ਰਿਸ਼ਵਤ ਲੈਣ ਦੇ ਦੋਸ਼; ਸੁਪਰਵਾਈਜ਼ਰ ਨੇ ਦੋਸ਼ਾਂ ਨੂੰ ਨਕਾਰਿਆ

 

 

ਆਂਗਣਵਾੜੀ ਵਰਕਰ ਦੀ ਨੌਕਰੀ ਬਹਾਲ ਕਰਨ ਬਦਲੇ ਅਧਿਕਾਰੀ ‘ਤੇ ਲੱਗੇ ਰਿਸ਼ਵਤ ਲੈਣ ਦੇ ਦੋਸ਼; ਸੁਪਰਵਾਈਜ਼ਰ ਨੇ ਦੋਸ਼ਾਂ ਨੂੰ ਨਕਾਰਿਆ

ਅੰਮ੍ਰਿਤਸਰ, 15 ਮਾਰਚ 2026

ਸਰਹੱਦੀ ਪਿੰਡ ਕੁੱਤੀਵਾਲ ਦੀ ਇੱਕ ਆਂਗਣਵਾੜੀ ਵਰਕਰ ਜਿੰਦਰ ਕੌਰ ਨੇ ਸੀ.ਡੀ.ਪੀ.ਓ. ਦਫ਼ਤਰ ਚੋਗਾਵਾਂ ਦੇ ਮੁਲਾਜ਼ਮਾਂ ‘ਤੇ ਨੌਕਰੀ ਬਹਾਲ ਕਰਨ ਦੇ ਨਾਂ ‘ਤੇ ਰਿਸ਼ਵਤ ਲੈਣ ਦੇ ਸੰਗੀਨ ਦੋਸ਼ ਲਗਾਏ ਹਨ। ਪੀੜਤ ਪਰਿਵਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਕੋਲੋਂ ਧੋਖੇ ਨਾਲ ਅਸਤੀਫ਼ਾ ਲਿਆ ਗਿਆ ਅਤੇ ਫਿਰ ਨੌਕਰੀ ਵਾਪਸ ਦਿਵਾਉਣ ਲਈ ਮੋਟੀ ਰਕਮ ਦੀ ਮੰਗ ਕੀਤੀ ਗਈ।

ਪੀੜਤ ਜਿੰਦਰ ਕੌਰ ਪਤਨੀ ਰਣਜੀਤ ਸਿੰਘ ਨੇ ਦੋਸ਼ ਲਾਉਂਦਿਆਂ ਹੋਇਆ ਦਾਅਵਾ ਕੀਤਾ ਕਿ, 18 ਨਵੰਬਰ 2025 ਨੂੰ ਉਸ ਕੋਲੋਂ ਇੱਕ ਕੋਰੇ ਕਾਗਜ਼ ‘ਤੇ ਦਸਤਖ਼ਤ ਕਰਵਾ ਕੇ ਅਸਤੀਫ਼ਾ ਲਿਖਵਾ ਲਿਆ ਗਿਆ, ਜਿਸ ਬਾਰੇ ਉਸ ਨੂੰ ਬਾਅਦ ਵਿੱਚ ਪਤਾ ਲੱਗਾ।

ਉਸ ਨੇ ਦੋਸ਼ ਲਾਇਆ ਕਿ ਸੁਪਰਵਾਈਜ਼ਰ ਨੇ ਉਸਦੇ ਘਰ ਆ ਕੇ ਨੌਕਰੀ ਬਹਾਲ ਕਰਵਾਉਣ ਬਦਲੇ 1.5 ਲੱਖ ਰੁਪਏ ਦੀ ਮੰਗ ਕੀਤੀ ਅਤੇ ਕਿਹਾ ਕਿ ਇਹ ਪੈਸੇ ਉੱਚ ਅਧਿਕਾਰੀਆਂ ਨੂੰ ਦੇਣੇ ਹਨ। ਜਿੰਦਰ ਕੌਰ ਮੁਤਾਬਕ ਉਨ੍ਹਾਂ ਨੇ 1 ਲੱਖ ਰੁਪਏ ਵਿਆਜ ‘ਤੇ ਚੁੱਕ ਕੇ ਉਕਤ ਸੁਪਰਵਾਈਜ਼ਰ ਨੂੰ ਦਿੱਤੇ। ਜਿੰਦਰ ਕੌਰ ਨੇ ਦਾਅਵਾ ਕੀਤਾ ਕਿ, ਉਨ੍ਹਾਂ ਕੋਲ ਪੈਸੇ ਦਿੰਦੇ ਸਮੇਂ ਦੀ ਵੀਡੀਓ ਵੀ ਮੌਜੂਦ ਹੈ।

ਪੀੜਤ ਮਹਿਲਾ ਨੇ ਦੁਖੀ ਮਨ ਨਾਲ ਦੱਸਿਆ ਕਿ ਵਿਆਜ ‘ਤੇ ਲਏ ਪੈਸਿਆਂ ਕਾਰਨ ਲੈਣਦਾਰ ਉਨ੍ਹਾਂ ਨੂੰ ਪਰੇਸ਼ਾਨ ਕਰ ਰਹੇ ਹਨ ਅਤੇ ਇਸ ਸਦਮੇ ਕਾਰਨ ਉਨ੍ਹਾਂ ਦਾ ਪੁੱਤਰ ਵੀ ਬਿਮਾਰ ਹੋ ਗਿਆ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜੇਕਰ ਉਨ੍ਹਾਂ ਦੇ ਪਰਿਵਾਰ ਦੇ ਕਿਸੇ ਜੀਅ ਨੇ ਕੋਈ ਗਲਤ ਕਦਮ ਚੁੱਕ ਲਿਆ, ਤਾਂ ਉਸ ਦੀ ਜ਼ਿੰਮੇਵਾਰੀ ਉਕਤ ਮੁਲਾਜ਼ਮਾਂ ਦੀ ਹੋਵੇਗੀ।

ਸੁਪਰਵਾਈਜ਼ਰ ਨੇ ਦੋਸ਼ਾਂ ਨੂੰ ਨਕਾਰਿਆ!

ਸੁਪਰਵਾਈਜ਼ਰ ਨੇ ਇੱਕ ਮੀਡੀਆ ਅਦਾਰੇ ਨਾਲ ਗੱਲਬਾਤ ਦੌਰਾਨ ਜਿੰਦਰ ਕੌਰ ਵਲੋਂ ਲਾਏ ਦੋਸ਼ਾਂ ਨੂੰ ਨਕਾਰਦਿਆਂ ਇਨ੍ਹਾਂ ਨੂੰ ਬੇਬੁਨਿਆਦ ਅਤੇ ਝੂਠੇ ਦੱਸਿਆ ਹੈ।