ਬ੍ਰਿਟਿਸ਼ ਕਲੰਬੀਆ ਦੀ ਵਿਧਾਨ ਸਭਾ ‘ਚ ਲੇਖਕ ਗੁਰਨੈਬ ਸਾਜਨ ਦਾ ਕੀਤਾ ਮੰਤਰੀ ਜਗਰੂਪ ਬਰਾੜ ਨੇ ਸਨਮਾਨ

 

ਪੰਜਾਬ ਨੈੱਟਵਰਕ, ਬਠਿੰਡਾ/ਬ੍ਰਿਟਿਸ਼ ਕਲੰਬੀਆ

ਬਠਿੰਡਾ ਦੇ ਪਿੰਡ ਦਿਉਣ ਦੇ ਜੰਮਪਲ ਜਗਰੂਪ ਸਿੰਘ ਬਰਾੜ ਜੋ ਛੇਂਵੀ ਵਾਰ ਬ੍ਰਿਟਿਸ਼ ਕਲੰਬੀਆ ਸੂਬਾ ਸਰੀ ਦੇ ਫਲੀਟਵੁੱਡ ਹਲਕੇ ਤੋਂ ਨਿਊ ਡੈਮੋਕਰੇਟਿਕ ਪਾਰਟੀ ਰਾਹੀਂ ਚੋਣ ਜਿੱਤ ਕੇ ਐਮਐਲਏ ਬਣਨ ਦੇ ਨਾਲ ਨਾਲ ਉਸਨੂੰ ਬ੍ਰਿਟਿਸ਼ ਕੋਲੰਬੀਆ ਸਰਕਾਰ ਵੱਲੋਂ ਮਨਿਸਟਰ ਆਫ਼ ਮਾਈਨਿੰਗ ਕਰਿਟੀਕਲ ਐਂਡ ਮਿਨਰਜ਼ ਵਜੋਂ ਰੁਤਬਾ ਦੇਕੇ ਸੂਬੇ ਦੇ ਲੋਕਾਂ ਲਈ ਵੱਡੀ ਜੁੰਮੇਵਾਰੀ ਦੇਕੇ ਨਿਵਾਜਿਆ ਹੈ।

ਉਨ੍ਹਾਂ ਵੱਲੋਂ ਆਪਣੇ ਪਿੰਡ ਦਿਉਣ ਦੇ ਬੇਬਾਕ ਕਲਮਕਾਰ ਅਤੇ ਫ਼ਿਲਮਕਾਰ ਗੁਰਨੈਬ ਸਾਜਨ ਦਿਉਣ ਨੂੰ ਬ੍ਰਿਟਿਸ਼ ਕੋਲੰਬੀਆ ਸੂਬਾ ਦੇ ਸਰੀ ਫਲੀਟਵੁੱਡ ਪਹੁੰਚਣ ਤੇ ਨਿੱਘਾ ਸਵਾਗਤ ਕੀਤਾ ਗਿਆ। ਇੱਥੇ ਦੱਸਣਾ ਬਣਦਾ ਹੈ ਕਿ ਦਿਉਣ ਦੇ ਜਗਰੂਪ ਸਿੰਘ ਬਰਾੜ ਕੈਨੇਡਾ ਦੀ ਸਰਗਰਮ ਸਿਆਸਤ ਵਿੱਚ ਲੰਬੇ ਅਰਸੇ ਤੋਂ ਅਹਿਮ ਯੋਗਦਾਨ ਪਾਉਂਦੇ ਆ ਰਹੇ ਹਨ।

ਜਿਸ ਕਰਕੇ ਫਲੀਟਵੁੱਡ ਦੇ ਵੋਟਰਾਂ ਵੱਲੋਂ ਉਸਨੂੰ ਛੇਵੀਂ ਵਾਰ ਐਮ ਐਲ ਏ ਜਿਤਾਇਆ, ਇਸ ਸਮੇਂ ਉਹ ਬੀ ਸੀ ਸੂਬੇ ਦੀ ਵਿਧਾਨ ਸਭਾ ਵਿੱਚ ਬਤੌਰ ਮਨਿਸਟਰ ਵਜੋਂ ਵਿਚਰ ਰਹੇ ਹਨ। ਆਪਣੇ ਪਿੰਡ ਦਿਉਣ ਤੋਂ ਉਨ੍ਹਾਂ ਕੋਲ ਪਹੁੰਚੇ ਬੇਬਾਕ ਕਲਮਕਾਰ ਗੁਰਨੈਬ ਸਾਜਨ ਨੂੰ ਕੈਨੇਡਾ ਦੀ ਧਰਤੀ ਤੇ ਪਹੁੰਚਣ ਲਈ ਜੀ ਆਇਆਂ ਨੂੰ ਆਖਿਆ ਅਤੇ ਸਰੀ ਵਿੱਚ ਪੰਜਾਬੀਆਂ ਵੱਲੋਂ ਪਾਏ ਯੋਗਦਾਨ ਅਤੇ ਸਰੀ ‘ਚ ਮਿੰਨੀ ਪੰਜਾਬ ਦੀ ਦੀ ਝਲਕ ਦਿਖਾਈ।

ਇਸ ਤੋਂ ਇਲਾਵਾ ਉਨਾਂ ਗੁਰਨੈਬ ਸਾਜਨ ਨੂੰ ਬੀਸੀ ਦੀ ਰਾਜਧਾਨੀ ਵਿਕਟੋਰੀਆ ਦੀ ਵਿਧਾਨ ਸਭਾ ਵਿੱਚ ਬੀਸੀ ਸਰਕਾਰ ਵੱਲੋਂ ਹੁੰਦੀਆਂ ਰਾਜਨੀਤਿਕ ਸਰਗਰਮੀਆਂ ਬਾਰੇ ਜਾਣਕਾਰੀ ਦਿੱਤੀ ਅਤੇ ਉਹਨਾਂ ਵਿਧਾਨ ਸਭਾ ਆਪਣੇ ਦਫਤਰ ਵਿੱਚ ਗੁਰਨੈਬ ਸਾਜਨ ਦੀ ਪਲੇਠੀ ਪੁਸਤਕ ਸਿਮਰਨ ਨੂੰ ਵੀ ਜਾਰੀ ਕੀਤਾ ਅਤੇ ਉਹਨਾਂ ਨੂੰ ਪੰਜਾਬ ਵਿੱਚ ਬਤੌਰ ਪੱਤਰਕਾਰ ਲੇਖਕ ਤੇ ਫ਼ਿਲਮਕਾਰ ਵਜੋਂ ਸ਼ਾਨਦਾਰ ਸੇਵਾਵਾਂ ਦੇਣ ਬਦਲੇ ਪ੍ਰਸੰਸਾ ਪੱਤਰ ਦੇ ਕੇ ਸਨਮਾਨਿਤ ਕੀਤਾ ਗਿਆ।

ਇਸ ਮੌਕੇ ਲੇਖਕ ਗੁਰਨੈਬ ਸਾਜਨ ਨੇ ਕਿਹਾ ਕਿ ਬ੍ਰਿਟਿਸ਼ ਕਲੰਬੀਆ ਸੂਬੇ ਦੀ ਵਿਧਾਨ ਸਭਾ ਵਿੱਚ ਉਹਨਾਂ ਦੇ ਪਿੰਡ ਦਿਉਣ ਤੋਂ ਜਗਰੂਪ ਸਿੰਘ ਬਰਾੜ ਬਤੌਰ ਮਨਿਸਟਰ ਮਾਈਨਿੰਗ ਆਫ ਕ੍ਰਿਟੀਕਲ ਐਂਡ ਮਿਨਰਜ਼ ਵਜੋਂ ਸਾਡੇ ਪਿੰਡ ਦਿਉਣ ਹੀ ਨਹੀਂ ਬਲਕਿ ਪੰਜਾਬ ਦਾ ਨਾਂਅ ਰੌਸ਼ਨ ਕਰ ਰਹੇ ਹਨ, ਸਾਨੂੰ ਉਹਨਾਂ ਉੱਪਰ ਹਮੇਸ਼ਾ ਮਾਣ ਰਹੇਗਾ, ਉਹਨਾਂ ਵੱਲੋਂ ਦਿੱਤਾ ਮਾਨ ਸਨਮਾਨ ਉਹ ਕਦੇ ਵੀ ਨਹੀਂ ਭੁੱਲ ਸਕਦਾ।

ਉਨ੍ਹਾਂ ਦੱਸਿਆ ਕਿ ਪੰਜਾਬ ਦਾ ਮਨਿਸਟਰ ਆਮ ਲੋਕਾਂ ਤੋਂ ਦੂਰ ਆਪਣੇ ਨਾਲ ਵੱਡਾ ਲਾਮ ਲਸ਼ਕਰ ਲੈਕੇ ਲੋਕਾਂ ਤੋਂ ਦੂਰੀ ਬਣਾਕੇ ਰੱਖਦਾ ਹੈ, ਪਰ ਕੈਨੇਡਾ ਦਾ ਐਮ ਐਲ ਏ, ਮਨਿਸਟਰ ਹਸਪਤਾਲ ਵਿਚ ਦਵਾਈ ਲੈਣੀ ਹੋਵੇ,ਬੱਸਾਂ ਟਰੇਨਾਂ ਵਿਚ ਚੜਨਾ ਹੋਵੇ , ਆਮ ਲੋਕਾਂ ਵਿੱਚ ਬਿਨਾਂ ਸੁਰੱਖਿਆ ਤੋਂ ਕਤਾਰ ਵਿਚ ਖੜ੍ਹਦਾ ਹੈ। ਕੈਨੇਡਾ ਚ ਪਾਣੀ ,ਹਵਾ,ਧਰਤੀ ਨੂੰ ਬਚਾਉਣ ਲਈ ਹਰ ਨਾਗਰਿਕ ਆਪੋ ਆਪਣੀ ਭੂਮਿਕਾ ਨਿਭਾਉਂਦਾ ਹੈ।ਉਨ੍ਹਾਂ ਕਿਹਾ ਕੈਨੇਡਾ ਚ ਸਿੱਖਿਆ,ਸਿਹਤ ਸਹੂਲਤਾਂ, ਖੇਡਾਂ ਵਿੱਚ ਬਰਾਬਰਤਾ ਦੇਖਣ ਨੂੰ ਮਿਲਦੀ ਹੈ, ਸਕੂਲਾਂ ਚ ਕਿਸਾਨ,ਮਜ਼ਦੂਰ, ਅਫਸਰ ਤੇ ਮੰਤਰੀ ਦਾ ਬੱਚਾ ਇਕ ਸਕੂਲ ਵਿੱਚ ਪੜ੍ਹਦੇ ਹਨ।

ਗੁਰਨੈਬ ਸਾਜਨ ਦਿਉਣ ਦੀ ਕਲਮ ਤੋਂ…

ਮੇਰੇ ਅਦਬੀ ਦੋਸਤੋ ਇਹ ਪ੍ਰਸ਼ੰਸ਼ਾ ਪੱਤਰ ਮੈਨੂੰ ਕੈਨੇਡਾ ਦੇ ਸੂਬੇ ਬ੍ਰਿਟਿਸ਼ ਕੋਲੰਬੀਆ ਦੀ ਰਾਜਧਾਨੀ ਵਿਕਟੋਰੀਆ ਦੀ ਵਿਧਾਨ ਸਭਾ ਚ ਮੇਰੇ ਪਿੰਡ ਦਿਉਣ ਜ਼ਿਲ੍ਹਾ ਬਠਿੰਡਾ ਦੇ ਜੰਮਪਲ ਜਗਰੂਪ ਸਿੰਘ ਬਰਾੜ ਐਮ ਐਲ ਏ ਫਲੀਟਵੁੱਡ ਸਰੀ ਅਤੇ ਮਨਿਸਟਰ ਆਫ਼ ਮਾਈਨਿੰਗ ਕਰਿਟੀਕਲ ਐਂਡ ਮਿਨਰਜ਼ ਨੇ ਵਿਧਾਨ ਸਭਾ ਆਪਣੇ ਆਫ਼ਿਸ ਚ ਮੇਰੀ ਪੱਤਰਕਾਰੀ, ਲੇਖਣੀ ਅਤੇ ਬਤੌਰ ਫ਼ਿਲਮਕਾਰ ਵਜੋਂ ਕੀਤੀਆਂ ਪ੍ਰਾਪਤੀਆਂ ਬਦਲੇ ਦੇਕੇ ਨਿਵਾਜਿਆ ਹੈ।

ਮੈਂ ਜਗਰੂਪ ਸਿੰਘ ਬਰਾੜ ਜੋ ਮੇਰੇ ਚਾਚਾ ਜੀ ਵੀ ਨੇ ਦਾ ਦਿਲ ਦੀਆਂ ਗਹਿਰਾਈਆਂ ਚੋਂ ਧੰਨਵਾਦ ਕਰਦਾ ਹਾਂ ਜੋ ਛੇ ਵਾਰ ਐਮ ਐਲ ਏ ਬਣਕੇ ਬਤੌਰ ਮਨਿਸਟਰ ਵਿਧਾਨ ਸਭਾ ਵਿੱਚ ਪਹੁੰਚਕੇ ਮੇਰੇ ਪਿੰਡ ਦਿਉਣ ਹੀ ਨਹੀਂ ਬਲਕਿ ਜ਼ਿਲ੍ਹਾ ਬਠਿੰਡਾ ਅਤੇ ਪੂਰੇ ਪੰਜਾਬ ਦਾ ਨਾਂਅ ਸੁਨਹਿਰੀ ਅੱਖਰਾਂ ਚ ਸੱਤ ਸਮੁੰਦਰੋਂ ਪਾਰ ਦੀ ਧਰਤੀ ਕੈਨੇਡਾ ਚ ਲਿਖ ਰਹੇ ਹਨ।

ਉਨ੍ਹਾਂ ਦਾ ਵਡੱਪਣ ਹੀ ਕਿਹਾ ਜਾ ਸਕਦਾ ਜਾਂ ਉਹ ਹਰ ਇਨਸਾਨ ਨੂੰ ਬਰਾਬਰਤਾ ਦੇਣ ਵਾਲੇ ਦੇਸ਼ ਕੈਨੇਡਾ ਦੇ ਨਾਗਰਿਕ ਹਨ। ਜਿਨ੍ਹਾਂ ਆਪਣੇ ਪਿੰਡ ਦੇ ਸਧਾਰਨ ਪਰਿਵਾਰ ਵਿੱਚ ਜਨਮੇ ਮੇਰੇ ਵਰਗੇ ਇਨਸਾਨ ਨੂੰ ਹਫ਼ਤਾ ਭਰ ਆਪਣੇ ਘਰ ਬੁਲਾਕੇ ਉਨਾਂ ਦੇ ਪਰਿਵਾਰ ਵੱਲੋਂ ਮੇਰੀ ਕੀਤੀ ਮਹਿਮਾਨ ਨਿਵਾਜ਼ੀ ਅਤੇ ਆਪਣੇ ਕੀਮਤੀ ਸਮੇਂ ਚੋਂ ਮੈਨੂੰ ਵਿਧਾਨ ਸਭਾ ਹੀ ਨਹੀਂ ਬਲਕਿ ਇਕ ਅਧਿਆਪਕ ਵਾਂਗ ਜਿੰਦਗੀ ਵਿੱਚ ਹਰ ਸਮੇਂ ਸਿੱਖਣ ਦੇ ਗੁਣ ਪੈਦਾ ਕਰ ਕੇ ਮੈਨੂੰ ਵਡਭਾਗੀ ਬਣਾਇਆ ਹੈ।

ਉਨ੍ਹਾਂ ਨੇ ਮੇਰੀ ਪਲੇਠੀ ਪੁਸਤਕ ਸਿਮਰਨ ਨੂੰ ਵਿਧਾਨ ਸਭਾ ਵਿਕਟੋਰੀਆ ਵਿਚ ਜਾਰੀ ਕਰਕੇ ਮੇਰੀ ਬੇਬਾਕ ਕਲਮ ਨੂੰ ਜੋ ਮਾਣ ਦਿੱਤਾ, ਸ਼ਾਇਦ ਮੈਨੂੰ ਅੱਜ ਤੱਕ ਪੰਜਾਬ ਚ ਐਨਾ ਮਾਣ ਸਨਮਾਨ ਨਹੀਂ ਮਿਲਿਆ। ਇਸ ਤੋਂ ਵੱਡਾ ਮਾਨ ਸਨਮਾਨ ਮੇਰੇ ਲਈ ਹੋਰ ਹੋ ਵੀ ਕੀ ਸਕਦਾ ਹੈ। ਵਾਹਿਗੁਰੂ ਮੇਰੇ ਸਤਿਕਾਰਯੋਗ ਚਾਚਾ ਜਗਰੂਪ ਸਿੰਘ ਬਰਾੜ ਉਨ੍ਹਾਂ ਦੇ ਸਮੁੱਚੇ ਬਰਾੜ ਪਰਿਵਾਰ ਅਤੇ ਉਨ੍ਹਾਂ ਦੇ ਵੱਡੇ ਭਰਾ ਜਸਵੰਤ ਸਿੰਘ ਬਰਾੜ ਜੋ ਸਮੇਂ ਸਮੇਂ ਤੇ ਮੇਰੀ ਕਲਮ ਦੀ ਹੌਂਸਲਾ ਅਫਜ਼ਾਈ ਕਰਦੇ ਰਹਿੰਦੇ ਹਨ ਨੂੰ ਚੜ੍ਹਦੀ ਕਲਾ ਵਿਚ ਰੱਖਣ।