ਅਮਰੀਕੀ ਵਫ਼ਦ ਦੇ ਵਿਰੋਧ ‘ਚ ਲੋਕ ਮੋਰਚਾ ਪੰਜਾਬ ਵੱਲੋਂ ਰੋਸ ਪ੍ਰਦਰਸ਼ਨ ਦਾ ਸੱਦਾ
ਪੰਜਾਬ ਨੈੱਟਵਰਕ, ਭੁੱਚੋ ਮੰਡੀ-
ਭਾਰਤੀ ਮੰਡੀ ਵਿੱਚੋਂ ਭਾਰਤ ਦੇ ਖੇਤੀ ਉਤਪਾਦਾਂ ਨੂੰ ਬਾਹਰ ਕਰਨ ਅਤੇ ਅਮਰੀਕੀ ਉਤਪਾਦਾਂ ਦੀ ਬੇਰੋਕ ਟੋਕ ਵਿਕਰੀ ਯਕੀਨੀ ਬਣਾਉਣ ਦੇ ਮਕਸਦ ਨੂੰ ਲੈ ਕੇ ਆਏ ਅਮਰੀਕੀ ਵਫ਼ਦ ਦੇ ਮਨਸੂਬੇ ਭਾਰਤੀ ਹਿੱਤਾਂ ਲਈ ਬੇਹੱਦ ਘਾਤਕ ਹਨ।
ਇਹ ਵਫ਼ਦ ਅਮਰੀਕੀ ਵਪਾਰ ਨੁਮਾਇੰਦੇ ਬ੍ਰੈਂਡਨ ਲਿੰਚ ਦੀ ਅਗਵਾਈ ਵਿੱਚ ਪੰਜ ਦਿਨਾਂ ਦੇ ਭਾਰਤ ਦੌਰੇ ਉੱਤੇ ਹੈ। ਇਸ ਦੇ ਵਿਰੋਧ ਵਿੱਚ ਲੋਕ ਮੋਰਚਾ ਪੰਜਾਬ ਵੱਲੋਂ 27 ਤਰੀਕ ਨੂੰ 3 ਵਜੇ ਟੀਚਰਜ਼ ਹੋਮ ਬਠਿੰਡਾ ਤੋਂ ਰੋਸ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਹੈ।
ਪ੍ਰੈੱਸ ਦੇ ਨਾਂ ਬਿਆਨ ਜਾਰੀ ਕਰਦਿਆਂ ਲੋਕ ਮੋਰਚਾ ਪੰਜਾਬ ਦੇ ਸੂਬਾ ਸਕੱਤਰ ਜਗਮੇਲ ਸਿੰਘ ਅਤੇ ਸੂਬਾ ਕਮੇਟੀ ਮੈਂਬਰ ਸ਼ੀਰੀਂ ਨੇ ਕਿਹਾ ਕਿ ਭਾਰਤ ਅੰਦਰ ਖੇਤੀ ਉਤਪਾਦਾਂ ਦੀ ਮੰਡੀ ਬੇਹੱਦ ਸੰਵੇਦਨਸ਼ੀਲ ਖੇਤਰ ਹੈ ਅਤੇ ਇਸ ਖੇਤਰ ਵਿੱਚ ਵਿਦੇਸ਼ੀ ਵਸਤਾਂ ਦੀ ਬੇਰੋਕ ਟੋਕ ਆਮਦ ਭਾਰਤੀ ਕਿਸਾਨਾਂ ਅਤੇ ਵਪਾਰੀਆਂ ਦੇ ਹਿਤਾਂ ਉੱਤੇ ਬੇਹੱਦ ਘਾਤਕ ਅਸਰ ਪਾਉਣ ਵਾਲੀ ਹੈ।
ਅਮਰੀਕਾ ਨੇ ਪਹਿਲਾਂ ਹੀ ਖੇਤੀ ਉਤਪਾਦਾਂ ਸਮੇਤ ਅਨੇਕਾਂ ਉਤਪਾਦਾਂ ਉੱਤੋਂ ਦਰਾਮਦ ਡਿਊਟੀਆਂ ਘਟਾਉਣ ਲਈ ਭਾਰਤ ਸਰਕਾਰ ਉੱਤੇ ਦਬਾਅ ਬਣਾਇਆ ਹੋਇਆ ਹੈ ਅਤੇ ਭਾਰਤ ਸਰਕਾਰ ਨੇ ਇਸ ਦਬਾਅ ਅੱਗੇ ਲਿਫਦਿਆਂ ਦਰਾਮਦ ਡਿਊਟੀਆਂ ਘਟਾਉਣ ਦਾ ਐਲਾਨ ਕੀਤਾ ਹੈ।
ਹੁਣ ਇਹ ਵਪਾਰ ਵਫਦ ਭਾਰਤ ਨੂੰ ਆਪਣੀ ਮੰਡੀ ਉਹਨਾਂ ਵਸਤਾਂ ਲਈ ਖੋਲਣ ਲਈ ਕਹਿ ਰਿਹਾ ਹੈ ਜਿਹਨਾਂ ਦੀ ਅਜੇ ਤੱਕ ਇਜਾਜ਼ਤ ਨਹੀਂ ਦਿੱਤੀ ਗਈ ਸੀ। ਇਸ ਤੋਂ ਪਹਿਲਾਂ ਵੀ ਅਮਰੀਕੀ ਬਦਾਮਾਂ,ਸੇਬਾਂ,ਮੀਟ ਅਤੇ ਹੋਰ ਕੁਝ ਉਤਪਾਦਾਂ ਲਈ ਭਾਰਤੀ ਮੰਡੀ ਖੋਲ੍ਹੀ ਜਾ ਚੁੱਕੀ ਹੈ।
ਹੁਣ ਮੱਕੀ, ਕਣਕ, ਡੇਅਰੀ ਉਤਪਾਦਾਂ ਸਮੇਤ ਅਨੇਕਾਂ ਵਸਤਾਂ ਨੂੰ ਭਾਰਤ ਦੀ ਮੰਡੀ ਵਿੱਚ ਵੇਚਣ ਦੀ ਇਜਾਜ਼ਤ ਹਾਸਲ ਕੀਤੀ ਜਾਣੀ ਹੈ। ਪਹਿਲਾਂ ਹੀ ਗਹਿਰੇ ਸੰਕਟ ਨਾਲ ਜੂਝ ਰਹੇ ਸਾਡੇ ਦੇਸ਼ ਦੇ ਕਿਸਾਨਾਂ ਅਤੇ ਵਪਾਰੀਆਂ ਉੱਤੇ ਇਸ ਕਦਮ ਨੇ ਵੱਡੇ ਨਾਂਹ ਪੱਖੀ ਅਸਰ ਪਾਉਣੇ ਹਨ।
ਬੁਲਾਰਿਆਂ ਨੇ ਅੱਗੇ ਕਿਹਾ ਕਿ ਅਮਰੀਕੀ ਦਬਾਅ ਹੇਠ ਝੁਕਦਿਆਂ ਭਾਰਤ ਸਰਕਾਰ ਇਥੋਂ ਦੇ ਕਿਸਾਨਾਂ ਅਤੇ ਵਪਾਰੀਆਂ ਦੇ ਹਿੱਤਾਂ ਨਾਲ ਵੱਡਾ ਖਿਲਵਾੜ ਕਰਨ ਜਾ ਰਹੀ ਹੈ। ਇਸ ਨਾਪਾਕ ਮਕਸਦ ਨੂੰ ਲੈ ਕੇ ਆਏ ਅਮਰੀਕੀ ਵਫਦ ਦਾ ਭਾਰਤ ਦੇ ਸਮੂਹ ਲੋਕਾਂ ਵੱਲੋਂ ਜੋਰਦਾਰ ਵਿਰੋਧ ਕੀਤੇ ਜਾਣਾ ਚਾਹੀਦਾ ਹੈ।
ਆਗੂਆਂ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਭਾਰਤੀ ਮੰਡੀ ਨੂੰ ਸਾਮਰਾਜੀ ਲੁੱਟ ਲਈ ਨਾ ਖੋਲ੍ਹਿਆ ਜਾਵੇ ਸਗੋਂ ਇਹਦੇ ਅੰਦਰ ਸਥਾਨਕ ਕਿਸਾਨਾਂ ਅਤੇ ਵਪਾਰੀਆਂ ਦੀ ਸਥਿਤੀ ਨੂੰ ਮਜਬੂਤ ਕੀਤਾ ਜਾਵੇ ਅਤੇ ਇਸ ਵਫਦ ਨੂੰ ਤੁਰੰਤ ਵਾਪਸ ਭੇਜਿਆ ਜਾਵੇ। ਉਹਨਾਂ ਨੇ ਇਸ ਸਬੰਧੀ ਹੋ ਰਹੇ ਰੋਸ ਪ੍ਰਦਰਸ਼ਨ ਵਿੱਚ ਹਿੱਸਾ ਲੈਣ ਲਈ ਸਮੂਹ ਲੋਕਾਂ ਨੂੰ ਸੱਦਾ ਦਿੱਤਾ ਹੈ।
