Punjab News: ਬੀ.ਐੱਲ.ਓਜ਼ ਤੋਂ ਦੋਹਰੀਆਂ ਡਿਊਟੀਆਂ ਲੈਣ ਦਾ ਫੈਸਲਾ! DTF ਵੱਲੋਂ ਸਖ਼ਤ ਵਿਰੋਧ
ਛੁੱਟੀ ਵਾਲੇ ਦਿਨ ਚੋਣ ਰਹਿਸਲ ਨਾ ਕਰਵਾਈ ਜਾਵੇ-ਡੀ.ਟੀ.ਐਫ਼.
ਐੱਸ ਏ ਐੱਸ ਨਗਰ 08 ਦਸੰਬਰ 2025 (Media PBN)
ਪੰਜਾਬ ਵਿੱਚ ਹੋ ਰਹੀਆਂ ਜ਼ਿਲਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਵਿੱਚ ਬੀ. ਐੱਲ. ਓਜ਼. ਦੀ ਵੀ ਚੋਣ ਡਿਊਟੀ ਲਗਾ ਦਿੱਤੀ ਹੈ ਜੋ ਕਿ ਪਹਿਲਾਂ ਹੀ ਸਾਰਾ ਸਾਲ ਚੋਣ ਡਿਊਟੀ ਕਰਦੇ ਰਹਿੰਦੇ ਹਨ। ਇਸ ਨੂੰ ਲੈਕੇ ਸਮੂਹ BLOs ਦੇ ਵੱਲੋਂ ਚੋਣ ਕਮਿਸ਼ਨ ਦੀ ਧੱਕੇਸ਼ਾਹੀ ਵਿਰੁੱਧ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਹੈ।
ਅਧਿਆਪਕਾਂ ਦੀ ਨੁਮਾਇੰਦਾ ਜਥੇਬੰਦੀ ਡੈਮੋਕ੍ਰੇਟਿਕ ਟੀਚਰਜ਼ ਫ਼ਰੰਟ ਪੰਜਾਬ ਦੇ ਸੂਬਾ ਪ੍ਰਧਾਨ ਦਿਗਵਿਜੇਪਾਲ ਸ਼ਰਮਾ ਅਤੇ ਸੂਬਾ ਸਕੱਤਰ ਰੇਸ਼ਮ ਸਿੰਘ ਖੇਮੁਆਣਾ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਪੰਜਾਬ ਦੇ ਲਗਭਗ 24000 ਚੋਣ ਬੂਥ ਹਨ, ਜਿਨ੍ਹਾਂ ਉੱਪਰ ਸਾਰਾ ਸਾਲ ਵੋਟਰਾਂ ਦੀ ਸੁਧਾਈ, ਵੋਟਾਂ ਬਣਾਉਣੀਆਂ ਅਤੇ ਕੱਟਣੀਆਂ, ਵੋਟਰਾਂ ਦੇ ਅਧਾਰ ਕਾਰਡ ਜੋੜਨੇ, ਵੋਟਰ ਦਿਵਸ ਮਨਾਉਣਾ ਅਤੇ ਹੁਣ ਅੱਗੇ ਐੱਸ ਆਈ ਆਰ ਦਾ ਸਰਵੇ ਵੀ ਆ ਰਿਹਾ ਹੈ, ਕੰਮ ਚਲਦਾ ਰਹਿੰਦਾ ਹੈ।
ਬੀ ਐੱਲ ਓਜ਼ ਨੂੰ ਐਤਵਾਰ ਅਤੇ ਛੁੱਟੀ ਵਾਲੇ ਦਿਨ ਵੀ ਕੰਮ ਕਰਨਾ ਪੈ ਰਿਹਾ ਹੈ ਇਸ ਤੋਂ ਵੀ ਵੱਧ ਕੇ ਕਈ ਵਾਰ ਕੰਮ ਦਾ ਪ੍ਰੈਸ਼ਰ ਏਨਾ ਹੁੰਦਾ ਹੈ ਕਿ ਬੀ ਐੱਲ ਓਜ਼ ਹਨੇਰੇ-ਸਵੇਰੇ ਆਪਣੇ ਘਰ ਵੀ ਇਹ ਕੰਮ ਕਰਦੇ ਰਹਿੰਦੇ ਹਨ। ਹੁਣ ਉਹਨਾਂ ਦੀ ਡਿਊਟੀ ਜ਼ਿਲਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਵਿੱਚ ਲਗਾ ਕੇ ਸਰਾਸਰ ਧੱਕਾ ਕੀਤਾ ਜਾ ਰਿਹਾ ਹੈ ਕਿਉਂਕਿ ਉਹਨਾਂ ਦੇ ਆਪਣੇ ਨਿੱਜੀ ਕੰਮ ਕਾਰ ਵੀ ਕਰਨੇ ਹੁੰਦੇ ਹਨ। ਇਸ ਨੂੰ ਜਥੇਬੰਦੀ ਬਿਲਕੁਲ ਵੀ ਬਰਦਾਸ਼ਤ ਨਹੀਂ ਕਰੇਗੀ।
ਜੱਥੇਬੰਦੀ ਦੇ ਸੀਨੀਅਰ ਮੀਤ ਪ੍ਰਧਾਨ ਸਰਵਣ ਸਿੰਘ ਔਜਲਾ, ਮੀਤ ਪ੍ਰਧਾਨ ਸੁਖਵਿੰਦਰ ਸੁੱਖੀ, ਵਿੱਤ ਸਕੱਤਰ ਜਸਵਿੰਦਰ ਸਿੰਘ, ਸਯੁੰਕਤ ਸਕੱਤਰ ਦਲਜੀਤ ਸਮਰਾਲਾ ਅਤੇ ਸੂਬਾ ਪ੍ਰੈੱਸ ਸਕੱਤਰ ਲਖਵੀਰ ਸਿੰਘ ਹਰੀਕੇ ਅਤੇ ਸਹਾਇਕ ਸਕੱਤਰ ਰਾਜਵਿੰਦਰ ਸਿੰਘ ਬੈਹਣੀਵਾਲ ਨੇ ਕਿਹਾ ਕਿ ਐਤਵਾਰ ਅਤੇ ਦੂਜੇ ਸ਼ਨੀਵਾਰ ਵਾਲੇ ਦਿਨ ਚੋਣ ਰਹਿਸਲ ਰੱਖ ਕੇ ਮੁਲਾਜ਼ਮਾਂ ਨੂੰ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ ਕਿਉਂਕਿ ਅਧਿਆਪਕ ਨੂੰ ਸਰਕਾਰੀ ਕਰਮਚਾਰੀ ਹੋਣ ਦੇ ਨਾਲ -ਨਾਲ ਬੱਚਿਆਂ ਅਤੇ ਮਾਤਾ ਪਿਤਾ ਦੀ ਦੇਖਭਾਲ ਕਰਨ ਵਰਗੇ ਘਰੇਲੂ ਕੰਮ ਹਨ। ਦੂਰ ਦੁਰਾਡੇ ਵਾਲੇ ਅਧਿਆਪਕ ਸਾਡੇ ਤਿੰਨ ਵਜੇ ਛੁੱਟੀ ਹੋਣ ਕਰਕੇ ਪੰਜ ਵਜੇ ਤੱਕ ਘਰ ਪਹੁੰਚਦੇ ਹਨ। ਇਸ ਨਾਲ ਉਹਨਾਂ ਦੇ ਛੁੱਟੀ ਵਾਲੇ ਦਿਨ ਨਿੱਜੀ ਕੰਮ ਕਾਰ ਜਿਵੇਂ ਬੱਚਿਆਂ ਜਾਂ ਮਾਤਾ ਪਿਤਾ ਦੀ ਦਵਾਈ ਦਵਾਉਣਾ ਆਦਿ ਕਰਨ ਵਿੱਚ ਦਿੱਕਤ ਆਉਂਦੀ ਹੈ। ਕਿਉਂਕਿ ਅਧਿਆਪਕਾਂ ਨੇ ਛੁੱਟੀ ਵਾਲੇ ਦਿਨ ਹੀ ਆਪਣੇ ਨਿੱਜੀ ਕੰਮ ਕਾਰ ਕਰਨੇ ਹੁੰਦੇ ਹਨ।
ਆਗੂਆਂ ਨੇ ਚੋਣ ਕਮਿਸ਼ਨ ਤੋਂ ਮੰਗ ਕੀਤੀ ਕਿ ਬੀ ਐੱਲ ਓਜ਼, ਗੰਭੀਰ ਬਿਮਾਰੀਆਂ ਵਾਲੇ, ਸਿੰਗਲ ਮਾਪੇ, ਔਰਤਾਂ ਅਤੇ ਵਿਧਵਾਵਾਂ ਨੂੰ ਚੋਣ ਡਿਊਟੀ ਤੋਂ ਛੋਟ ਦਿੱਤੀ ਜਾਵੇ।
