ਪੰਜਾਬ ਅਧਿਆਪਕਾ ਨਾਲ ਦਿਨ ਦਿਹਾੜੇ ਲੁੱਟ, ਸਕੂਲ ਤੋਂ ਘਰ ਰਹੀ ਸੀ ਟੀਚਰ
ਜਗਰਾਉਂ
ਸਕੂਲ ਤੋਂ ਘਰ ਜਾ ਰਹੀ ਇੱਕ ਕਰਾਟੇ ਦੀ ਟੀਚਰ ਨੂੰ ਦੋ ਲੁਟੇਰਿਆਂ ਵੱਲੋਂ ਰਸਤੇ ਵਿੱਚ ਘੇਰ ਕੇ ਲੁੱਟ ਲਏ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ।
ਥਾਣਾ ਸਦਰ ਜਗਰਾਉਂ ਦੇ ਏਐਸਆਈ ਰਾਜ ਵਰਿੰਦਰ ਪਾਲ ਸਿੰਘ ਨੇ ਦੱਸਿਆ ਕਿ ਪ੍ਰੇਰਨਾ ਰਾਣੀ ਉਰਫ ਦੀਪੂ ਪੁਤਰੀ ਪ੍ਰਵੀਨ ਕੁਮਾਰ ਵਾਸੀ ਤਲਵੰਡੀ ਖੁਰਦ ਥਾਣਾ ਦਾਖਾ ਨੇ ਸ਼ਿਕਾਇਤ ਦਰਜ ਕਰਵਾ ਕੇ ਆਪਣੇ ਬਿਆਨ ਵਿੱਚ ਦੱਸਿਆ ਕਿ ਉਹ ਤੇਜਸ ਸਕੂਲ ਵਿੱਚ ਕਰਾਟੇ ਦੀ ਟੀਚਰ ਹੈ।
ਬੀਤੀ 24 ਮਾਰਚ ਨੂੰ ਸਵੇਰੇ 11 ਵਜੇ ਦੇ ਕਰੀਬ ਆਪਣੀ ਐਕਟਵਾ ਉੱਪਰ ਸਵਾਰ ਹੋ ਕੇ ਆਪਣੇ ਪਿੰਡ ਤੋਂ ਜਗਰਾਉਂ ਜਾ ਰਹੀ ਸੀ ਅਤੇ ਜਦੋਂ ਨਹਿਰ ਪੁੱਲ ਕਲਾਰ ਤੋਂ ਥੋੜਾ ਅੱਗੇ ਨਹਿਰ ਦੇ ਕਿਨਾਰੇ ਬਣੇ ਕੱਚੇ ਰਸਤੇ ਉੱਤੇ ਥੋੜਾ ਜਿਹਾ 200 ਮੀਟਰ ਦੇ ਕਰੀਬ ਅੱਗੇ ਗਈ ਤਾਂ ਪਿੰਡ ਹਾਸ ਕਲਾ ਸਾਈਡ ਤੋਂ ਦੋ ਅਣਪਛਾਤੇ ਨੌਜਵਾਨ ਜੋ ਮੋਟਰਸਾਈਕਲ ਉੱਪਰ ਸਵਾਰ ਸਨ।
ਜਿਨਾਂ ਨੇ ਆਪਣਾ ਮੋਟਰਸਾਈਕਲ ਤੇਜ਼ ਕਰਕੇ ਐਕਟਵਾ ਦੇ ਅੱਗੇ ਲਾ ਕੇ ਉਸਨੂੰ ਰੋਕ ਲਿਆ ਅਤੇ ਜ਼ਬਰਦਸਤੀ ਉਸ ਦੀ ਐਕਟਵਾ ਬੰਦ ਕਰਕੇ ਚਾਬੀ ਕੱਢ ਲਈ।
ਇੱਕ ਨੌਜਵਾਨ ਨੇ ਉਸ ਦੀਆਂ ਬਾਹਾਂ ਫੜ ਲਈਆਂ ਅਤੇ ਦੂਸਰੇ ਵਿਅਕਤੀ ਨੇ ਸੋਟੀ ਨਾਲ ਉਸ ਉਪਰ ਵਾਰ ਕੀਤਾ ਅਤੇ ਉਸ ਦੀ ਜੇਬ ਵਿੱਚੋਂ ਦੋ ਫੋਨ ਕੱਢ ਲਏ ਅਤੇ ਉਸ ਦੀ ਪੈਂਟ ਦੀ ਪਿਛਲੀ ਜੇਬ ਵਿੱਚੋਂ ਉਸ ਦਾ ਪਰਸ ਵੀ ਕੱਢ ਲਿਆ।
ਪਰਸ ਵਿੱਚ ਤਕਰੀਬਨ 10 ਹਜਾਰ ਰੁਪਏ ਸਨ ਤੇ ਇਹ ਲੁਟੇਰੇ ਨਗਦੀ ਅਤੇ ਮੋਬਾਇਲ ਖੋਹ ਕੇ ਮੌਕੇ ਤੋਂ ਫਰਾਰ ਹੋ ਗਏ। ਲੁਟੇਰਿਆਂ ਦੇ ਖਿਲਾਫ ਥਾਣਾ ਸਦਰ ਜਗਰਾਉਂ ਵਿਖੇ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।
