ਪੱਤਰਕਾਰਾਂ ਅਤੇ DC ਦੀ ਲੜ੍ਹਾਈ ‘ਚ ਕੁੱਦੇ ਕਾਂਗਰਸੀ ਐਮ.ਪੀ! ਹਿੱਕ ਠੋਕ ਕੇ ਪੱਤਰਕਾਰਾਂ ਨਾਲ ਖੜ੍ਹਨ ਦਾ ਕੀਤਾ ਐਲਾਨ
ਨੌਕਰਸ਼ਾਹ ਅਤੇ ਰਾਜਸੀ ਲੀਡਰ ਜਨਤਾ ਦੇ ਨੌਕਰ, ਉਹਨਾਂ ਨੂੰ ਲੋਕਾਂ ਦੀ ਗੱਲ ਸੁਣਨੀ ਹੀ ਪੈਣੀ:- ਘੁਬਾਇਆ
ਪਰਮਜੀਤ ਢਾਬਾਂ, ਜਲਾਲਾਬਾਦ
ਫਾਜ਼ਿਲਕਾ ਡਿਪਟੀ ਕਮਿਸ਼ਨਰ ਦੇ ਪੱਤਰਕਾਰ ਨਾਲ ਅਪਣਾਏ ਜਾ ਰਹੇ ਕਥਿਤ ਅੜੀਅਲ ਰਵੱਈਏ ਨੂੰ ਲੈ ਕੇ ਫਾਜ਼ਿਲਕਾ ਨਾਲ ਸੰਬੰਧਿਤ ਪੱਤਰਕਾਰਾਂ ਵੱਲੋਂ ਉਸ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ ਅਤੇ ਸਰਕਾਰੀ ਸਮਾਗਮਾਂ ਦਾ ਬਾਈਕਾਟ ਦਾ ਵੀ ਐਲਾਨ ਕੀਤਾ ਹੋਇਆ ਹੈ।
ਇਸ ਨੂੰ ਲੈ ਕੇ ਲਗਾਤਾਰ ਪੱਤਰਕਾਰਾਂ ਵੱਲੋਂ ਜਿੱਥੇ ਮੀਟਿੰਗਾਂ ਕਰਕੇ ਜ਼ਿਲ੍ਹਾ ਪੱਧਰੀ ਵੱਡਾ ਸੰਘਰਸ਼ ਵਿੱਢਣ ਦਾ ਐਲਾਨ ਕਰਨ ਬਾਰੇ ਵਿਚਾਰ ਵਟਾਂਦਰੇ ਚੱਲ ਰਹੇ ਹਨ,ਉਥੇ ਇਸ ਸਭ ਦੇ ਵਿਚਕਾਰ ਲੋਕ ਸਭਾ ਹਲਕਾ ਫਿਰੋਜ਼ਪੁਰ ਦੇ ਸਾਂਸਦ ਸ਼ੇਰ ਸਿੰਘ ਘੁਬਾਇਆ ਫਾਜ਼ਿਲਕਾ ਸਮੂਹ ਪੱਤਰਕਾਰ ਭਾਈਚਾਰੇ ਨਾਲ ਹਿੱਕ ਤਾਣ ਕੇ ਖੜ ਗਏ ਹਨ।
ਉਹਨਾਂ ਨੇ ਪੱਤਰਕਾਰ ਭਾਈਚਾਰੇ ਨੂੰ ਵਿਸ਼ਵਾਸ ਦਿਵਾਉਂਦਿਆਂ ਕਿਹਾ ਕਿ ਉਹ ਉਹਨਾਂ ਨਾਲ ਇੱਕ ਤਾਣ ਕੇ ਖੜੇ ਹਨ ਅਤੇ ਉਹਨਾਂ ਦੀ ਆਵਾਜ਼ ਨੂੰ ਉਹ ਜਿੱਥੋਂ ਤੱਕ ਕਹਿਣਗੇ, ਭਾਵ ਪਾਰਲੀਮੈਂਟ ਤੱਕ ਵੀ ਪਹੁੰਚਾਉਣਗੇ।
ਇੱਕ ਸਵਾਲ ਦੇ ਜਵਾਬ ਵਿੱਚ ਉਹਨਾਂ ਸਿੱਧੇ ਤੌਰ ਤੇ ਕਿਹਾ ਕਿ ਨੌਕਰਸ਼ਾਹ ਭਾਵ ਅਧਿਕਾਰੀ ਅਤੇ ਰਾਜਸੀ ਲੀਡਰ ਲੋਕਾਂ ਦੇ ਨੌਕਰ ਹਨ,ਕਿਉਂਕਿ ਉਹ ਲੋਕਾਂ ਲਈ ਕੰਮ ਕਰਨ ਲਈ ਨਿਯੁਕਤ ਹਨ ਤਾਂ ਫਿਰ ਪੱਤਰਕਾਰ ਤਾਂ ਸਮਾਜ ਦੇ ਬੇਹਤਰੀ ਲਈ ਕੰਮ ਕਰਦੇ ਹਨ। ਇਸ ਤਰ੍ਹਾਂ ਡੀਸੀ ਨੂੰ ਪੱਤਰਕਾਰਾਂ ਨਾਲ ਅੜੀਅਲ ਰਵੱਈਏ ਵਾਲਾ ਵਿਹਾਰ ਨਹੀਂ ਕਰਨਾ ਚਾਹੀਦਾ।
ਇਥੇ ਹੀ ਬੱਸ ਨਹੀਂ ਉਹਨਾਂ ਨੂੰ ਆਮ ਲੋਕਾਂ ਨਾਲ ਵੀ ਸਹੀ ਤਰ੍ਹਾਂ ਪੇਸ਼ ਆਉਣਾ ਚਾਹੀਦਾ ਹੈ। ਐਮਪੀ ਘੁਬਾਇਆ ਨੇ ਕਿਹਾ ਕਿ ਜੇਕਰ ਪੱਤਰਕਾਰ ਉਹਨਾਂ ਨੂੰ ਲਿਖਤੀ ਕੋਈ ਵੀ ਸ਼ਿਕਾਇਤ ਦੇਣਗੇ,ਤਾਂ ਉਹਨਾਂ ਦੀ ਸ਼ਿਕਾਇਤ ਨੂੰ ਜਿੱਥੋਂ ਤੱਕ ਉਹ ਕਹਿਣਗੇ,ਉਹ ਪਹੁੰਚਾਉਣਗੇ ਅਤੇ ਉਹਨਾਂ ਦੇ ਰੁਤਬੇ ਨੂੰ ਆਂਚ ਨਹੀਂ ਆਉਣ ਦੇਣਗੇ।
ਉਹਨਾਂ ਇਹ ਵੀ ਕਿਹਾ ਕਿ ਅਗਲੇ ਹਫਤੇ ਉਹਨਾਂ ਦੀ ਡੀਸੀ ਨਾਲ ਮੀਟਿੰਗ ਹੈ ਅਤੇ ਉਹ ਪੱਤਰਕਾਰਾਂ ਨਾਲ ਮਸਲੇ ਨੂੰ ਹੱਲ ਕਰਵਾਉਣ ਲਈ ਆਪਣੀ ਪਹਿਲ ਕਦਮੀ ਕਰਨਗੇ, ਜੇਕਰ ਫਿਰ ਵੀ ਡੀਸੀ ਦਾ ਰਵੱਈਆ ਇਸ ਤਰ੍ਹਾਂ ਹੀ ਅੜੀਅਲ ਰਹਿੰਦਾ ਹੈ,ਤਾਂ ਉਹ ਹਰ ਤਰ੍ਹਾਂ ਪੱਤਰਕਾਰਾਂ ਦਾ ਸਾਥ ਦੇਣਗੇ।
