ਈਟੀਟੀ ਟੈੱਟ ਪਾਸ ਬੇਰੁਜ਼ਗਾਰ ਅਧਿਆਪਕ ਯੂਨੀਅਨ ਦੇ ਸੂਬਾ ਪ੍ਰਧਾਨ ਬਣੇ ਸੁਨੀਲ ਗਗਨ ਫਾਜ਼ਿਲਕਾ
ਕਿਹਾ, ਹਜ਼ਾਰਾਂ ਅਸਾਮੀਆਂ ਖਾਲੀ, ਨਿਯੁਕਤੀਆਂ ਕਰਕੇ ਓਵਰ ਏਜ਼ ਹੋਣੋਂ ਬਚਾਇਆ ਜਾਵੇ
ਬਠਿੰਡਾ
ਈਟੀਟੀ (ਐਲੀਮੈਂਟਰੀ ਟੀਚਰਜ਼ ਟ੍ਰੇਨਿੰਗ) ਅਤੇ ਟੀਚਰਜ਼ ਐਲਿਜੀਬਿਲਟੀ ਟੈਸਟ (ਟੈੱਟ) ਪਾਸ ਬੇਰੁਜ਼ਗਾਰ ਅਧਿਆਪਕ ਯੂਨੀਅਨ ਨੇ ਸੂਬਾ ਪੱਧਰੀ ਇਜਲਾਸ ਕਰਕੇ ਸੁਨੀਲ ਗਗਨ ਫਾਜ਼ਿਲਕਾ ਨੂੰ ਆਪਣਾ ਨਵਾਂ ਸੂਬਾ ਪ੍ਰਧਾਨ ਚੁਣਿਆ ਹੈ।ਜਥੇਬੰਦੀ ਨੇ ਆਪਣੀ ਸੂਬਾ ਕਮੇਟੀ ਦਾ ਵੀ ਵਿਸਥਾਰ ਕੀਤਾ ਹੈ।
ਇਜਲਾਸ ਨੇ ਮੁੱਖ ਮੰਤਰੀ ਅਤੇ ਸਿੱਖਿਆ ਮੰਤਰੀ ਤੋਂ ਮੰਗ ਕੀਤੀ ਹੈ ਕਿ ਸੂਬੇ ਅੰਦਰ ਸਰਕਾਰੀ ਸਕੂਲਾਂ ਚ ਈਟੀਟੀ ਅਧਿਆਪਕਾਂ ਦੀਆਂ ਖਾਲੀ ਪਈਆਂ ਹਜ਼ਾਰਾਂ ਅਸਾਮੀਆਂ ਲਈ ਤੁਰੰਤ ਇਸ਼ਤਿਹਾਰ ਜਾਰੀ ਕਰਕੇ ਨਿਯੁਕਤੀਆਂ ਕੀਤੀਆਂ ਜਾਣ। ਇਹ ਵੀ ਧਿਆਨ ਚ ਲਿਆਂਦਾ ਗਿਆ ਕਿ ਜੇਕਰ ਇਹ ਨਿਯੁਕਤੀਆਂ ਜਲਦ ਨਾ ਕੀਤੀਆਂ ਗਈਆਂ ਤਾਂ ਬੇਰੁਜ਼ਗਾਰ ਅਧਿਆਪਕਾਂ ਦਾ ਇੱਕ ਖ਼ਾਸਾ ਵਰਗ ਓਵਰ ਏਜ਼ ਹੋ ਜਾਵੇਗਾ ,ਤੇ ਇੰਜ ਵੀਹ ਵੀਹ ਸਾਲ ਲਾਕੇ ਕੀਤੀ ਕਮਾਈ ਖੂਹ ਖਾਤੇ ਪੈ ਜਾਵੇਗੀ। ਇਜਲਾਸ ਇੱਥੋਂ ਦੇ ਚਿਲਡਰਨ ਪਾਰਕ ਵਿਖੇ ਹੋਇਆ।
ਜਥੇਬੰਦੀ ਦੇ ਪ੍ਰੈੱਸ ਸਕੱਤਰ ਨਵਦੀਪ ਬੱਲੀ ਨੇ ਮੀਟਿੰਗ ਦੀ ਕਾਰਵਾਈ ਜਾਰੀ ਕਰਦਿਆਂ ਅੱਗੇ ਦੱਸਿਆ ਕਿ ਹੋਈ ਇਸ ਚੋਣ ਵਿਚ ਬਲਵੰਤ ਪਟਿਆਲਾ ਨੂੰ ਉਪ ਪ੍ਰਧਾਨ, ਨਵਦੀਪ, ਰਾਜਦੀਪ ਅਤੇ ਸੰਦੀਪ ਸਿੰਘ ਨੂੰ ਪ੍ਰੈੱਸ ਸਕੱਤਰ,ਜਨਰਲ ਸਕੱਤਰ ਰਾਜਿੰਦਰ ਸਿੰਘ,ਸਕੱਤਰ ਹੈਪੀ, ਖਜਾਨਚੀ ਪਰਮਜੀਤ ਸਿੰਘ,ਪੰਕਜ, ਰੈਨੂੰ , ਸਲਾਹਕਾਰ ਮਨਪ੍ਰੀਤ ਮਾਨਸਾ, ਪਰਮਜੀਤ ਸਿੰਘ ਅਤੇ ਅਮਨਦੀਪ ਕੰਬੋਜ ਨੂੰ ਚੁਣਿਆ ਗਿਆ।ਮਹਿਲਾ ਵਿੰਗ ਦੀ ਅਗਵਾਈ ਪ੍ਰਿਆ ਮੁਕਤਸਰ ਅਤੇ ਆਂਚਲ ਨੂੰ ਸੌਂਪੀ ਗਈ। ਕਾਰਜਕਾਰੀ ਕਮੇਟੀ ਵਿਚ ਮੈਂਬਰ ਵਜੋਂ ਜੋਤੀ, ਸਿਮਰਨਜੋਤ ਕੌਰ, ਅੰਕੁਸ਼,ਜੀਵਨ ਸਿੰਘ ਤੇ ਸ਼ਿਵਮ ਨੂੰ ਲਿਆ ਗਿਆ। ਇਹ ਚੋਣ ਸਮੁੱਚੇ ਕਾਡਰ ਨੇ ਸਰਬਸੰਮਤੀ ਨਾਲ ਕੀਤੀ।
ਬੇਰੁਜ਼ਗਾਰਾਂ ਨੇ ਆਪਣੀ ਤ੍ਰਾਸਦੀ ਬਿਆਨ ਕਰਦਿਆਂ ਦੱਸਿਆ ਕਿ ਉਹ +2 ਪਾਸ ਕਰਨ ,ਦੋ ਸਾਲਾ ਟੀਚਰਜ਼ ਟ੍ਰੇਨਿੰਗ (ਈਟੀਟੀ) ਅਤੇ ਬਹੁਤ ਸਖ਼ਤ ਮੁਕਾਬਲੇ ਵਾਲੀ ਟੈੱਟ ਪ੍ਰੀਖਿਆ ਪਾਸ ਕਰਨ ਤੋਂ ਬਾਅਦ ਵੀ ਰੁਜ਼ਗਾਰ ਵਿਹੂਣੇ ਹਨ,ਇਸ ਲਈ ਸਰਕਾਰ ਪੰਜਾਬ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲਾਂ ਚ ਖਾਲੀ ਪਈਆਂ ਹਜ਼ਾਰਾਂ ਅਸਾਮੀਆਂ ਤੇ ਅਧਿਆਪਕਾਂ ਦੀ ਨਿਯੁਕਤੀ ਕਰਨ ਲਈ ਭਰਤੀ ਇਸ਼ਤਿਹਾਰ ਬਿਨਾਂ ਦੇਰੀ ਜਾਰੀ ਕਰੇ।
