ਸਿੱਖਿਆ ਵਿਭਾਗ ਦਾ ‘ਈ-ਪੰਜਾਬ’ ਪੋਰਟਲ ਫੇਲ੍ਹ, ਅਧਿਆਪਕ ਪ੍ਰੇਸ਼ਾਨ!

 

ਅਧਿਆਪਕਾਂ ਨੂੰ ਬਦਲੀਆਂ ਕਰਵਾਉਣ ਦਾ ਦਿੱਤਾ ਗਿਆ ਸੁਨਹਿਰੀ ਮੌਕਾ ਸਿੱਖਿਆ ਵਿਭਾਗ ਦੀ ਤਕਨੀਕੀ ਨਾਕਾਮੀ ਦੀ ਭੇਟ ਚੜ੍ਹਿਆ

ਬਦਲੀਆਂ ਕਰਵਾਉਣ ਤੋਂ ਹਜ਼ਾਰਾਂ ਅਧਿਆਪਕ ਵਾਂਝੇ!

ਬਦਲੀਆਂ ਲਈ ਅਪਲਾਈ ਕਰਨ ਦਾ ਅੱਜ ਆਖਰੀ ਦਿਨ, ਪਰ ਪੋਰਟਲ ਠੱਪ

ਚੰਡੀਗੜ੍ਹ, 21 ਜਨਵਰੀ 2026- ਪੰਜਾਬ ਸਰਕਾਰ ਵੱਲੋਂ ‘ਵਿਸ਼ੇਸ਼ ਛੋਟ’ (Exempted Category) ਅਧੀਨ ਅਧਿਆਪਕਾਂ ਨੂੰ ਬਦਲੀਆਂ ਕਰਵਾਉਣ ਦਾ ਦਿੱਤਾ ਗਿਆ ਸੁਨਹਿਰੀ ਮੌਕਾ ਸਿੱਖਿਆ ਵਿਭਾਗ ਦੀ ਤਕਨੀਕੀ ਨਾਕਾਮੀ ਦੀ ਭੇਟ ਚੜ੍ਹਦਾ ਨਜ਼ਰ ਆ ਰਿਹਾ ਹੈ।

ਵਿਭਾਗ ਦੇ ‘ਈ-ਪੰਜਾਬ’ (epunjabschoolportal) ਪੋਰਟਲ ਦੇ ਨਾ ਚੱਲਣ ਕਾਰਨ ਸੂਬੇ ਭਰ ਦੇ ਅਧਿਆਪਕ ਅਥਾਹ ਮਾਨਸਿਕ ਪਰੇਸ਼ਾਨੀ ਅਤੇ ਖੱਜਲ-ਖੁਆਰੀ ਦਾ ਸਾਹਮਣਾ ਕਰ ਰਹੇ ਹਨ।

ਸਮਾਂ ਵਧਾਉਣ ਦੇ ਬਾਵਜੂਦ ਹਾਲਾਤ ਜਿਉਂ ਦੇ ਤਿਉਂ

ਸਿੱਖਿਆ ਵਿਭਾਗ ਵੱਲੋਂ ਜਾਰੀ ਪੱਤਰ ਅਨੁਸਾਰ, ਅਧਿਆਪਕਾਂ ਨੂੰ ਆਪਣਾ ਡਾਟਾ ਜਿਵੇਂ ਕਿ ਜਨਰਲ ਵੇਰਵੇ, ਨਤੀਜੇ ਅਤੇ ਸਰਵਿਸ ਰਿਕਾਰਡ ਅਪਡੇਟ ਕਰਨ ਲਈ ਪਹਿਲਾਂ 12 ਜਨਵਰੀ ਤੋਂ 18 ਜਨਵਰੀ 2026 ਤੱਕ ਦਾ ਸਮਾਂ ਦਿੱਤਾ ਗਿਆ ਸੀ।

ਪੋਰਟਲ ਵਿੱਚ ਆਈਆਂ ਤਕਨੀਕੀ ਦਿੱਕਤਾਂ ਅਤੇ ਅਧਿਆਪਕਾਂ ਦੀ ਮੰਗ ਨੂੰ ਦੇਖਦੇ ਹੋਏ ਵਿਭਾਗ ਨੇ ਇਸ ਸਮੇਂ ਨੂੰ ਵਧਾ ਕੇ 21 ਜਨਵਰੀ 2026 ਤੱਕ ਕਰ ਦਿੱਤਾ ਸੀ।

ਪਰ ਅਫ਼ਸੋਸ ਦੀ ਗੱਲ ਹੈ ਕਿ ਅੱਜ ਆਖਰੀ ਦਿਨ ਹੋਣ ਦੇ ਬਾਵਜੂਦ ਪੋਰਟਲ ਨਾ ਚੱਲਣ ਕਾਰਨ ਅਧਿਆਪਕ ਆਪਣੇ ਵੇਰਵੇ ਭਰਨ ਤੋਂ ਅਸਮਰੱਥ ਹਨ।

ਵਿਭਾਗ ਨੇ Exempted Category ਅਧੀਨ ਆਉਂਦੇ ਅਧਿਆਪਕਾਂ, ਕੰਪਿਊਟਰ ਫੈਕਲਟੀ ਅਤੇ ਨਾਨ-ਟੀਚਿੰਗ ਸਟਾਫ਼ ਨੂੰ ਬਦਲੀ ਲਈ ਆਨਲਾਈਨ ਅਪਲਾਈ ਕਰਨ ਦਾ ਮੌਕਾ ਦਿੱਤਾ ਸੀ।

ਪਰ ਜਦੋਂ ਵੀ ਅਧਿਆਪਕ ਪੋਰਟਲ ਖੋਲ੍ਹਣ ਦੀ ਕੋਸ਼ਿਸ਼ ਕਰਦੇ ਹਨ, ਤਾਂ ਸਰਵਰ ਡਾਊਨ ਹੋਣ ਕਾਰਨ ਪੋਰਟਲ ਖੁੱਲ੍ਹ ਹੀ ਨਹੀਂ ਰਿਹਾ।

ਇਸ ਨਾਲ ਗੰਭੀਰ ਬਿਮਾਰੀਆਂ ਜਾਂ ਹੋਰ ਵਿਸ਼ੇਸ਼ ਹਾਲਤਾਂ ਦਾ ਸਾਹਮਣਾ ਕਰ ਰਹੇ ਅਧਿਆਪਕ ਸਰਕਾਰ ਦੀ ਇਸ ਸਹੂਲਤ ਦਾ ਫਾਇਦਾ ਉਠਾਉਣ ਤੋਂ ਵਾਂਝੇ ਰਹਿ ਸਕਦੇ ਹਨ।

ਅਧਿਆਪਕ ਜਥੇਬੰਦੀਆਂ ਵਿੱਚ ਭਾਰੀ ਰੋਸ

ਅਧਿਆਪਕ ਜਥੇਬੰਦੀ ਡੀ.ਟੀ.ਐਫ਼. (DTF) ਦੇ ਪ੍ਰਧਾਨ ਵਿਕਰਮਦੇਵ ਸਿੰਘ ਨੇ ਵਿਭਾਗ ਦੀ ਇਸ ਕਾਰਜਪ੍ਰਣਾਲੀ ‘ਤੇ ਸਵਾਲ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿ “ਵਿਭਾਗ ਅਧਿਆਪਕਾਂ ਨੂੰ ਸਹੂਲਤ ਦੇਣ ਦੀ ਬਜਾਏ ਪਰੇਸ਼ਾਨ ਕਰਨ ‘ਤੇ ਲੱਗਿਆ ਹੋਇਆ ਹੈ।”

ਵਿਕਰਮਦੇਵ ਸਿੰਘ ਨੇ ਕਿਹਾ ਕਿ “ਜਦੋਂ ਵਿਭਾਗ ਨੂੰ ਪਤਾ ਹੈ ਕਿ ਪੋਰਟਲ ਵਿੱਚ ਤਕਨੀਕੀ ਖਾਮੀ ਹੈ, ਤਾਂ ਇਸ ਨੂੰ ਤੁਰੰਤ ਠੀਕ ਕਿਉਂ ਨਹੀਂ ਕੀਤਾ ਗਿਆ?” “ਸਾਡੀ ਮੰਗ ਹੈ ਕਿ ਬਦਲੀਆਂ ਲਈ ਅਪਲਾਈ ਕਰਨ ਦਾ ਸਮਾਂ ਹੋਰ ਵਧਾਇਆ ਜਾਵੇ ਅਤੇ ਪੋਰਟਲ ਨੂੰ ਜਲਦੀ ਦਰੁਸਤ ਕੀਤਾ ਜਾਵੇ।”